الخطوات المثالية لتمشيط شعرك المُجعد/المموج!

أهلاً وسهلاً جميعاً، أتمنى إنكم و من تحبون بصحة و عافية يا كريم

الشهر عليكم مبارك، أعتذر كالعادة عن الانقطاع ولا خلاص ندخل بالموضوع؟

أحس ندخل بالموضوع أحسن

زي ماعودتكم كلام فاضي ما أحب، أنا أحب التفصيل بما يفيد و الشفافية بكل شيء

اليوم راح نتكلم عن شغلة جداً مهمة وهي تمشيط و تصفيف الشعر المجعد

ماراح أقولكم عن تساريح (نخليها لتدوينات لاحقة بإذن الله)ا

بس بشكل يومي و روتيني كيف ممكن تتعاملي مع شعرك عشان يطلع بصورة مرتبة و حلوة

اتفقنا قبل إن الشعر الكيرلي (المجعد) أهم نقطة في العناية فيه ترطيبه،ا

 شعرك مو مرطب بشكل كافي راح ينفش و يصير حفلة (نقطة)ا

على هذا الاتفاق إلي احنا خالصين منه لازم أوضح كم شغلة، أنا نصحتكم باستخدام منتجات مختصة بالشعر الكيرلي و سبق و وضحت لكم إيش الي تحتاجوه يكون في المنتج و إيش إلي تنتبهوا منه و فيه منتجات اقترحتها عليكم و الخيار لكم مفتوح لأنكم الحين عارفين ايش الي ما نبغاه (سيليكون، سولفيت، و باربين) و نبغى مكونات لما نقرأها نحسها معروفة و مفهومة

راح يكون فيه تدوينات قادمة لمنتجات كثيرة غير الي جربتهم قبل بمشيئة الله لكن مو هذا الي أبغى أوضحه هنا

إلي أبغاكم تفهمونه و تحطونه في اعتباركم إن الفكرة الأهم في "الترطيب" أياً كان المنتج

صح إن المنتجات المخصصة أفضل و أصح لشعرك بس هذا مايعني إنك ماتقدرين تعتنين بشعرك المجعد بمنتجات عادية من السوق

أتكلم عن الناس إلي ماعندهم إمكانية يطلبون ولا ماعندهم بالسوبرماركت منتجات مخصصة، عبري بمنتجات متوفرة مو مشكلة

مايعني هذا صح و مثالي لكن الفكرة إنه (ممكن) و عشان أثبت لكم هالشيء حيكون فيه تدوينة خاصة لتجربتي مع منتجات عادية لقيتها ببندة تنزل قريب إن شاء الله

فزبدة الموضوع، بغض النظر عن إن المنتجات المخصصة هي الأفضل هذا مايمنع إنك تقدرين تعبرين بإلي متاح عندك و تبدأي رحلة العناية بشعرك المجعد

وضح لكم الموضوع؟ حلوين كعادتكم

عندك بلسم كويس؟ عندك كريم بطل؟ عندك زيوت و مرطبات للشعر طبيعية؟ تمام نعتمد عليهم مو مشكلة أبداً

النقطة المهمة في ترطيب الشعر المجعد انك ترطبينه وهو مبلول

سالفة انك تنتظري شعرك ينشف و تضيفين له كريم ولا زيت هذي انسيها تماماً

حتى لو بتضيفي زيت ولا ماسك وبعدين بتغسليه مهم جداً شعرك يكون مغسول و رطب عشان يستفيد منه الشعر وفعلاً يترطب

بنات أرجوكم ركزوا بكل نقطة أقولها و أنا أسهب بالشرح عشان كل شيء يصير واضح

شعرك يكون مبلول يعني لما تضغطيه او تعصريه يطلع صوت بغغغ بغغغغ 😍هذا الي نبغى نضيف له مرطب ولا كريم

الآن دخلتي الشاور (أنصحك تقسمي شعرك لو كثير)ا

غسليه بماي، بعدها أضيفي له بلسم ، كيف شلون بلسم؟ ايه نعم بلسم أول

وبعد ماتحطي البلسم تقدري تفكي التعقيد بيدك بسلاسة وهو فيه بلسم عشان يساعدك

فكيتي التعقيدات مشطتيه بيدك وحسيتي بشكل عام الشعر مفكوك مو ملكع؟ تمام جيبي فرشتك ولا مشطك

ومشطيه وقتها وانت تحت الماي، بهالطريقة تضمني شعرك تمشط و تفكك بدون تقطيع كثير و بدون ألم

و كالعادة التمشيط يكون من تحت لفوق من تحت لفوق من تحت لفوق أرجوكم

خلصتي من تمشيط شعرك؟ تمام تحسي فروتك مو نظيفة ودك تتنظف وقتها ممكن تستخدمي شامبو (على الفروة فقط فقط)ا

فركي فروتك بالشامبو بأصابيعك مو بأظافرك أعيد و أكرر بالأصابع مو بالأظافر تمام؟

حلو نظفتي فروتك و غسلتيها ممكن تترجعي تحطي بعد الشامبو بلسم مرة ثانية ولا قناع ولا أياً كان

بعد آخر خطوة راح تغسلي شعرك صح؟ صح

غسلتي شعرك و خلصتي شاور خليه عبال ماتلبسي الروب/ملابسك

او ترتبي أغراضك ممكن بس لا تطولي و تروحي تعيشي حياتك لا

نحتاج شعرك مبلول و رطب قد مايكون أنا حرفياً أسوي هالشي حتى قبل أطلع من الشاور و هذا الأفضل عشان أضمن شعري رطب جداً مو يصبصب ماي بس يعني  لما اضغط شنو؟ بالضبط😂 اسمع الصوت الي حكيت لكم عليه بغغغغ بغغغغغ هذا الوقت المثالي لإضافة الكريم/ليف إن كونديشنر أو المرطب إيش ما كنتِ تسميه

فرقي شعرك و خليك كريمة و أنا أعنيها خليك كريمة و إنتِ تحطي المنتج إلي تبغيه سواءً كان مرطب و لا بديل زيت ولا أياً كان

تأكدي كل أجزاء شعرك ينحط عليها المنتج بكرم بس كمان لا تحطي كمية مهولة أوزني الكمية بارك الله فيك

نصيحتي لكم استخدموا فرشة مخصصة للشعر المجعد .. فرشة!!! تمزحين!!!ا

 ايوة عادي فرشة مسموح فيها وشعرك مبلول و عندك منتج ترطيب

هذي الفرشة السحرية اسمها "دِنمن" شريتها من أمازون قبل فترة أول ما اشتريتها كرهتها و رميتها لأن ما كنت أعرف استخدمها

*هي الفرشة إلي بالصورة الأولى من البوست و صفحتها على أمازون من هنا*

الدِنمن حلوة مرة للتصفيف مو لتمشيط شعرك و فك التعقيد راح تموتين لو استخدميتها وشعرك مجعلك ومتشابك

كمان تقدري تعدلي بأسنانها زيي أنا مخلية فراغ بين كل صف هذا إلي ناسبني لو كل الصفوف يصير حجم الخصلات أصغر فيعني يصير عندك تجعيدات أصغر أصغر، تفضيل شخصي جربي الاثنين و شوفي ايش يناسبك

الفكرة يا بنات انها رهيبة مرة في ترتيب التجعيدات تخليها مقسمة و مرتبة و ناعمة بشكل حلو تهدي مرة النفشة

المهم تعرفي كيف تستخدميها: شعرك ممشط و مافيه تعقيد، مبلول و حاطة لك منتج ترطيب

أنا طريقتي أقسم شعري و كل قسم أحط عليه منتج الترطيب الي أستخدمه و بعدين أمشط القسم بالدِنمن و هكذا لين أخلص شعري

ماشاء الله شعري كثير و طويل فأحيانا لما أوصل لآخر الأقسام يكون خف البلل الي فيه فايش اسوي؟ ارجع ابخ عليه ماي ولا احط الشاور على القسم المراد مرة ثانية بشكل خفيف و سريع عشان يرجع مبلول بالقدر المثالي و اسوي فيه مثل الباقي

فهنا أعيد و أكرر تصفيف الشعر الكيرلي فقط وهو مبلول بالماي غير كذا شعرك راح ينفش و تتحولين أسد و قولوا ماقلت لكم👿

طيب بنات فيه أشياء حلو تعرفونها و انتوا تمشطوا شعركم بالدِنمن الشعر لما تمشطيه بالعادة الناس تمشط من فوق لتحت يعني بشكل طولي باتجاه الأرض هذا غلط يخلي شعرك يهجد بزيادة ويصير ميت اذا تبغيه فلفي و الكيرلز حقتك تبين حلوة

 مشطيه على برا يعني القسم لما تمشطيه خلي اتجاهك برا فروتك مش الأرض زي كذا

*هذي الصورة من مقطع مصففة شعريوتيوبر رهيبة شوفوا المقطع لو ودكم بالضغط هنا*

بعد ما خلصنا تفكيك، غسيل، ترطيب و تصفيف الشعر

أنصحك تقلبي راسك بهدوء بحيث شعرك ينزل باتجاه الأرض و ابدأي اضغطي عليه بهدوء من تحت لفوق كأنك بترجعيه لفروتك

بهالشكل:

مهم تسويه بشكل هادئ عشان ما يتشابك ولا ينفش

هالحركة تساعد بتجعيد شعرك أكثر

بعد كذا انتِ خلصتي

انتبهي لا تحطي منشفة زي ما اتفقنا قبل

عندك خيار تخليه ينشف بالهواء الطبيعي

أو تلفيه بتيشرت أو قطعة حرير

كيف الطريقة؟ عادي زي ما قلت لك تو اقلبي راسك لتحت خلي شعرك ينزل للأرض من قدامك زي الصورة

و بعدين جيبيه على التيشرت و لا على الحرير على سريرك و نزلي بشويش

كأنك تضغطيه لين خلاص راسك لاصق على التيشرت

وبعدها اربطي شعرك و خليه لين ينشف او يمتص الماي و فكيه

طبعاً الشعر مثالي يوم الترويشة و اليوم الي بعدها بعدها طبيعي شعرك يبدأ ينفش شويتين ولا تحسيه يموت عادي ارجعي تحممي من جديد ولا جددي التصفيف عن طريق انك تبلليه ببخاخ ماي و ترطبيه مرة ثانية للأجزاء الميتة وبيرجع حلو

هذا يا بنات الطريقة بالتفصيل الممل عشان كُل شيء يكون مثالي و شعرك يطلع مرتب

طبعاً اذا كنتِ في بداية الرحلة و شعرك لازال يتعافى من ضرر الحرارة

و الاستشوار ماراح يتجعد بشكل مثالي ولا راح يصير شكله حلو أبداً

في مرحلة البداية أنصحكم بالضفاير مثل ماحكيت بأول تدوينة لي

هذي الطريقة بتكون مثالية للي مر عليها وقت و شعرها بدأ فعلاً يتجعد حتى من الأطراف و صار صحي

أنا استغرق مني 3 سنوات من الانقطاع الكلي عن الحرارة و كمان قصيت اطرافي كذا مرة عشان أوصل لشعر صحي و مجعد بشكل مثالي تضبط معاه هالطريقة فلو سويتي كل الي  قلته وباقي شعرك شكله غريب ومو مقنع معناته يبغى له صبر كمان

طيب أنا مرة نفسي شعري يصير مجعد بشكل مثالي الآن ايش ممكن أسوي؟ فيه طريقة رهيبة رهيبة رهيبة

أنا أسويها للآن لما يكون لي خلق لأن يبغى لها جهد و وقت

مميزاتها حتى لو شعرك مجعد بيصير تجعيدته أكثر مثالية و أكثر ترتيب و بيكون نسبة النفشة فيه 0% حتختفي أوعدك

 و كمان تطول معك التجعيدة و يجلس شعرك مرتب لأيام لو انتبهتي له وقت النوم

ايش هالطريقة؟

 👋ببساطة أصابعك

زي ماقلنا كل الخطوات الي قبل بس بدل ما تمشطي بالدِنمن امسكي خصلة خصلة

و لفيها بإصباعك برم من أولها لآخرها و اتركيها و روحي للي بعدها

هالطريقة راح تنجح إذا شعرك مبلول بالقدر الكافي و لك فترة طويلة تاركة الحرارة و أدوات الفرد

 و كمان لو شعرك فعلاً مجعد مو ويفي ولا ستريت لأن وقتها ماراح تمسك اللفة

حلوة مرة لتدريب شعراتك على التجعد و اللف من جديد بس زي ماقلت عشان تكون مثالية تحتاج يكون شعرك صحي من فترة

بس عاد جربوها ومع الوقت راح تصير أحلى و أحلى

و بكذا أنا خلصت

أحاول قد ما أقدر أوضح لكم كل شيء بتفاني و أطول الحكي عليكم عشان يوضح كل شيء

 ادعموا المدونة باشتراككم و تعليقاتكم و نشرها لأي أحد ممكن يستفيد

وحسابي بإنستقرام

proudcurly

أحبكم جميعاً و أتمنى لكم شعر جميل و صحي و الأهم شعر تحبوه و واثقين منه❤

لا تنسوني من دعواتكم بهالشهر