رحلة إسترجاع طبيعة شعري المجعد .. البداية لشعري الكيرلي



يا صباح الفل و يا مساء الياسمين 🌸
أبتدي معكم توثيق رحلة العمر و عودة الحياة لشعري اللطيف 💕
أمانةً لي سنة كاملة من البداية الفعلية لهذي الرحلة لكنها ما انتهت و لا ناوية أنهيها للأبد
و بما إن لي سنة كاملة خضتها بدون توثيق قررت يكون هذا موضوعي الإفتتاحي
أعطيكم فيه متى بدأت و كيف و ليش؟ الموضوع سواليف لكن من رأيي إنها تفاصيل تهمكم

قبل السنة هذي كُنت مختلفة جذرياً في تعاملي مع شعري ..
😐شنو يعني شعر كيرلي شنو يعني مجعد؟ مستحيل أصلاً أفكر بهالشي
حرفياً من عرفت نفسي و أختي الكبيرة تستشور لي
 😂و ماشاء الله عليها استشوارها بطل يا بنتي تكوي لك الشعرة صحححح
 💘و الله حتى المشاغل مايعجبني شغلهم اختي اسم الله عليها تخلي شعري لا إله إلا الله 
كانت هذي حالتي من عرفت نفسي و أنا شعري مسشور
(في الغالب يعني لدرجة إني ما أذكر شعري كيف)

كنت مهووسة بالشعر الستريت أو المستقيم أو السايح مدري شلون تسموونه
 😀حتى كان أبرز أحلامي ألقى خلطة سحرية تخلي شعري ناعم مستقيم مافيه تجعيدة وحدة
طبعاً جربت خلطات كثير و بلا شك كلها باءت بالفشل و كنت بين فترة و فترة أفرد شعري
 بالفرد المنزلي و يضبططططط لدرجة بعده عادي أسبح بكل أريحية
😕لأني بدون فرد أتفشل من كشة شعري و كذا يعني
💀جربت معالج الكيراتين المخيس حسيت جاني بعده تساقط قال معالج قال و الله مخرب
بس ماعلينا .. أختي الثانية الله يحفظها صارت هم بعد فنانة بالاستشوار
تخيلوا وصلت فيني مستحيل أخلي شعري مو مستشور فكل أسبوع أو أسبوعين أستشور شعري
كانت حالة مزرية للأمانة، أساساً كل ما أتروش أقعد شايلة هم الساعة و النص
💔إلي بقعد أحرق شعري فيها و تتلسع فروتي ، جدياً كان موضوع ثقيل ثقيل على قلبي

أحس تسلسل القصة هنا مفروض ينتهي بإني لقيت خلطة سحرية تخلي شعرك ستريت
بدون أي حرارة و بهذلة بس آسفة ماعندي لك شيء كذا و الله :(

شفيني شطحت؟ نرجع لموضوعنا
المهم هذا حالي من سنين و منين استشوار و فرد و مرد و شرد .. ماراح أكذب عليكم
و أقولكم شعري انعدم بشكل مرعب و كان شكله مريع و لا يضبط
لا و الله كان وسيع صدر الله يخليه و طول باله معي الله يجزاه خير 
 😁و شكله فعلياً يطلع حلو و جميل (بالاستشوار) و هذا إلي خلاني أستمر كل هالسنين في هالضياع
و كنت أستعر من كشتي و حقيقتها و صارعندي نفور ذاتي من حقيقة شعري المجعدة
شعري وقتها ما كان مجعد هو مجعد بس وقتها كان (كششششة)

و تذكروا فيه نوعيات شعر ماراح تتحمل كمية الحرارة بالشكل المستمر هذا و تنعدم بشكل أسرع
و ممكن تنحرق و حتى توصل لمرحلة ما تطول خلاص مافيه إلا زيادة طول طفيفة
كله يعتمد على طبيعة شعرك و نوعيته و ظروفه و جيناتك

عموماً استمراري على هالحال سنين طويلة كان لأسباب كثيرة من أبرزها التسويق و الإعلام للشعر الستريت
حتى دعايات الشامبو الحريري إلي يحول شعرك لشعر ستريت و لامع و حلو و حتى المشاهير
يعني إلي كانو مشاهير و شعورهم مجعدة أو كيرلي أذكرهم ميريام فارس و شاكيرا
البقية كلهم ماعطين شوشهم بالحرارة و البهذلة فكان خلاص عندنا الكشخة و الجمال
الشعر المستقيم الستريت و هالشي أثر علي و على نفسيتي من ناحية شعري و ثقتي بنفسي بشكل كبير

 لكن مع هالسنين من استخدام الحرارة و التمعيط إلا إن عمري ما ارتحت للوضع أو تعودت عليه
دايم ثقيل على قلبي بشكل رهيب خصوصاً إن شعري و (لله الحمد) كثير بس هالشي متعب بالإستشوار
فكان لي محاولات بائسة عدة مرات إني أستسلم بدافع إني خلاص طفشت
أذكر فترة طلعت هبة الكدش و الكشش وقتها كنت بنهاية الابتدائي و بداية المتوسط
قصيت شعري و كنت اربطه و اكدش أطرافه يعنني كول .. طبعاً ما اقتنعت
💔بشكل شعري وهو صدق كان خايس ههههههههههههههههههههههههههههههههههههههه استغفر الله
😆المهم إني كنسلت الموضوع و رجعت للبلاوي المتلتلة (حشى مخدرات موب استشوار)

إلي أبي أوضحه إن من خلال هذي المحاولات شفت شعري بدون استشوار يعني عطيته فرصة
و بما إني مبهذلته بالحرارة سنين فهو بالتأكيد فقد طبيعته الكيرلية
 و صار كذا مستقيم بشكل شين واقف كذا ناشف و كشة و منفوش
🦁يعني شكله الله لا يوريكم أبد مثل شعر الأسد 
😹طبعاً ما كنت متصالحة مع نفسي لدرجة إني أصور و لا الصراحة ودي أوريكم كيف كان

وأصلاَ عندنا بالسعودية مجحفين حقوق الكيرلي مافيه منتجات عناية لنا
  كلها للشعر الحريري الستريت حسبي الله عليهم حتى و الله منتجات سيئة و مضرة

المهم يعني مرت السنين و أنا في داخلي فكرة التخلص من الاستشوار أو استخدام الحرارة لشعري

إلين جات فترة كذا قلت خليني أحب شعري و أتفاهم معاه بالطيب و أحاول أتعايش معاه و أشوف
امكن يزين امكن يطلع أحلى امكن يعني نصير نحب بعض و أرتاح من الاستشوار و الهم

وبما إني إنسانة مدمنة يوتيوب و دايماً أتفرج على كفار فكله أجانب يعني 
👀دخلت أتفرج مقاطع عن الشعر الكشة و التفاهم معه و تهجيده بدون حرارة (موب بالهصياغة أمانةَ)
 و الله و بدأت أدخل في عالم مقاطع "الشعر الكيرلي" كثير منهم قصص حياتهم مشابهة لقصتي
و هذا إلي شدني أحسهم يوصفوني *يزينهم  بس الله يهديهم للإسلام
المهم أتوقع ختمت كل المقاطع و الله بدون مبالغة

من يومها الله يبارك فيكم و أنا مليانة حماس و عزيمة و أصدق النية و أدخل أمازون
و أطلب لي منتجات للشعر الكيرلي

المنتجات و كل الأشياء إلي استفدت منها و كل شيء من اليوتيوب و الكتب و البحث بنزله هنا بمدونتي"
"باللغة العربية و هذا أصلاً إلي دفعني لإنشاء هذي المدونة إنه فعلاً مسحوب علينا يا العرب محد قالنا ولا أحد علمنا

😳ماعلينا بس قلت أطمنكم عشان تكملون معي السالفة
المرة ذي كانت غير كل المرات .. المرة هذي مادخلت بنية اني تعبت من الاستشوار
😀و لا بنية اني ابي اشوف شعري ينفع أو لا؟ لا أنا فعلاً تعبت من الاستشوار
💕بس النية الأساسية إني هالمرة أبي أتعايش مع طبيعة شعري أبي أحبه و أكون سعيدة و فخورة فيه
ما أبي أخبي شعري ما أبي ألجأ لمنتجات و بلاوي مريعة عشان أغير منه
و غير كذا المرة هذي أنا مجربته قبل و عارفة شعري كيف بيكون
و متهيئة لشكله بالبداية بيكون معدوم و من فوق فيه تجعيدات سيئة و من تحت بيكون ممعط بشكل شين
و بيكون ناشف و منفوش عارفة كل هالأشياء و عازمة النية إني أتعايش معه
😻و شفت بعيني ناس مثلي تماماً و وصلوا لنتايج مذهلة و جميلة 

و أثناء بحثي و إطلاعي ركزت على الشعر الكيرلي و شفت جماله
و هممممم قعدت أقول أن ويني من زمان؟ و الله مرة جميل ياليت شعري كذا
(و الحين طبعاً بدأ الإعلام و الموضة ينصفونا و بالعكس صار هبة)
هنا عندكم صور لشعور كيرلي طبيعية و جميلة صدق يعني كل شيء ربي يخلقه جميل








شايفين جمال الشعر المجعد؟
ستريت كيرلي ملولو كلش جميل بس العناية هي الي تفرق و طبعاً اعتزازك بنفسك شي مهم 

🙆و إنت بطريقتك تظهرين جمالك .. بثقتك و نظافتك و إهتمامك




صرت متحمسة أكثر أستعيد طبيعة شعري الكيرلي و لذلك الحمد لله من هذاك اليوم
إلى يوم كتابتي لكم كملت سنة بدون استخدام الحرارة أو الاستشوار ولا حتى ربع خصلة من شعري :)
😍😎فخورة جداً بهالشي و سعيدة بشكل ما تتصورونه يا رب لك الحمد

بوريكم صور لشعري بالاستشوار و شعري أول يوم تروشت ولا استشورته و قررت أجعده
طبعاً استخدمت شيا مويستشر (عندهم مثل الكريم يساعد بالتجعيد بتحفظون الماركة هذي معي إن شاء الله)
😒بس حتى ماضبط الموضوع و كان فيه تجعيد بسييييط لا يذكر و لما نشف ماعجبني أبد

طبعاً فيه شغلة لازم تفهمينها شعرك المجعد أو السبايرال (الملفلف) إذا كان متعرض لحرارة
لفترة طويلة أو كان فيه مواد فرد مثل الكيراتين و البروتين أو حتى ولا شي بس كنتِ ماتعتنين فيه
 بتشوفين شكله يلوع الكبد تلقينه شوي كيرلي من فوق و من تحت ممطوط و حالته حالة
و الشعر من نصه لنهايته مافيه تجعيدة الشعر الكيرلي الحلوة أو لفلفة الشعر السبايرال
عادي حبيبتي طالما تعرفين طبيعة شعرك كيرلي اصبري عليه
😏💓و بيستعيد رونقه و جماله (حسيت تحفة مو شعر)
لما أقول اصبري عليه مو يعني تنتظرين شهر شهرين لا خلاص انتِ غيري حياتك بشكل جذري
و راح تقعدين سنتين ثلاثة إلين ما توصلين للنتيجة المذهلة

💇تقدرين تقصين منه بعد كل فترة و هالشي بيساعدك بشكل كبير انك تستعيدينه بشكل سريع
كثير من الأجانب إلي شفتهم قصوا الجزء المعدوم كامل من نص الشعر إلى نهايته و بكذا
بقي الجزء الي توه طالع صحي و فريش

شخصياً ماعندي الشجاعة ولا الرغبة إني أحش شعري هالحشة مرة وحدة
🙅فكان لازم ألاقي حلول أخرى أي تساريح أي شي المهم إني ما أمسك حرارة

فكنت شسوي؟ أتروش و أطلع أحط بشعري كونديشنر (كريم مرطب للشعر) مع كريم للتجعيد
شي خفيف و كلهم منتجات ثقة مافيهم مكونات خرابيط و بكلمكم عنهم بعدين بإذن الله
المهم أربط شعري و بعدين أضفره ( أو أسويه جدايل على قولة أهل نجد ) أخليه كذا يوم
و أفضل نتيجة يومين و أفتحه و خلاص يضبط و يصير حلو .. خليني أوريكم
نتيجة التسريحة إلي ممشية وضعي فيها خلال هذي السنة

طبعاً تشوفون هذي صور من نهاية السنة قبل كم شهر شعري زادت لمعته الحمد لله
و ترى بدون الخطوات إلي ذكرتها بيقعد كشة و منفوش لأنه باقي عليه
 بس أنا أضبطه على طول أول ما أطلع من الشاور
تحسونه ويفي أكثر من إنه كيرلي بس لأني بضفيرة وحدة أسويه و بالنسبة لي أسهل و أسرع
و فيه تسريحة ثانية أقسم شعري أربعة أقسام و أضفر كل قسم لحاله فتصير ضفاير/جدايل صغار
💘فلما أفكهم يصير التجعيد أكثر و يصير شكله كيرلي أكثر

حتى الآن ماوصلت للنتيجة النهائية و باقي لي مشوار
لكن شعري تحسن بشكل كبير الحمد لله و الأهم نفسيتي ناحية شعري و ثقتي فيه تغيرت
بشكل جذري .. بدأت أحب شعري و أتطلع إني أشوفه بطبيعته الكاملة
💆حياتي صارت جداً أريح مافيه إستشوار و لا كلام فاضي أبداً

شكل شعري أشاركم إياه لغرض مساعدتكم و تشجيعكم و عشان الوضوح 
و مثل ما أحب هالشيء في الأجانب مصداقيتهم و وضوحهم أحس من باب أولى هذا الشيء يكون بيننا

هذي كانت فقط بداية الرحلة و من وين بدأت و كيف كنت قبل بدايتي
بالنسبة للنصايح و المنتجات و التجارب راح تنزل على تدوينات مختلفة
😉كونوا بالقرب و بإذن الله تجدون كل ما يسركم

المدونة ممكن تفيد كل أنواع الشعر الويفي الكيرلي السبايرالز
لأن شعورنا أكثر عرضة للجفاف و التكسر و بسبب أيضاً الحرارة و المنتجات السيئة
إلي نستخدمهم خربت شعورنا بشكل مريع فلذلك تشوفونهم سيئين ، لكن الشعر بكل أنواعه و الله العظيم جميل
متى ما اعتنيتي فيه و كان صحي و مرطب إيش ما كانت صورته مستقيم مموج مجعد لولبي
😍بيكون شكله حلو و جميل و ملفت

مدونتي راح تركز على الشعر بشكل كبير منتجات و ماسكات و خلطات
و نصايح و تجارب و سوالف و كل شيء، و راح تكون فيه أشياء ثانية مالها بالشعر
لأني مهتمة بشكل عام بالعناية و الجمال

موفقين يا مُزز

هناك 19 تعليقًا:

  1. ويني عنننننك والله حمستيني حماااس الله يسعدك ويوفقك ويكتب لك ما تتمنين ��❤️❤️❤️

    ردحذف
    الردود
    1. أجمعين يا رب يا كريم، شكراً لكلامك الطيب و فالك شعر صحي و جميل مثلك يا رب 3>

      حذف
  2. ايش المنتجات اللي تستخدميها، شامبو بلسم كريم....

    ردحذف
    الردود
    1. تلقينها بتدوينة ثانية، و قريب راح تنزل تدوينة جديدة للمنتجات أخرى استخدمتها خلال السنة الماضية

      حذف
  3. الله يوفقش و يجزاش كل خيير ما تدرين شقد انا مبسوطه ان فيه وحده عربيه تتكلم عن الشعر الكيرلي استمري 😍💕مرره استفدت منش💕

    ردحذف
    الردود
    1. حبيبتي و يكتب لك بالمثل في دعواتك الحلوة، ممتنة لكلامك الطيب و دعمك 3>

      حذف
  4. والله مشكلتك نفس مشكلتي بالضبط لاعت كبببدي من الاستشواار ومااقدر اتركه بدون شكله مكدش ومنفوش وماله شكل مرتب كل خصله شكل منعدم من الاستشواار والبروتين اللي حطيته مررره خاايس تعبت منه ودي يكون عندي ثقه واخليه على طبيعته قدام زوجي بس ناافشش يفششل 🙁

    ردحذف
    الردود
    1. نافش لأنه مُتضرر من الحرارة و المعالجات الكيميائية، ركزي بنصايحي أكتبها لكم من قلب بكل تدوينة أوعدك مع الوقت شعرك راح يتغير جذرياً لأن شعري كان مثلك: مبدئياً احرصي على ترطيبه وهو مبلول وبعدها على طول ضفريه ولا حطيه ببون (كعكة) و خليه لين ينشف بعدها فكيه حيكون مقبول لك .. يحتاج وقت وصبر و بإذن الله قدها وحتى وهو منفوش شوي صدقيني حلوة 3> اصبري عليه أرجوك و أهم شيء "حبيييه"

      حذف
  5. حبيت اسلوبك بالكلام سبحان الله تجين للقلب الحمدالله ان الله اعطاني عقل وقلت لازم اعتني بشعري ولقيت رابط المدونه وبكمل معاك إلى مااخلص المدونه

    ردحذف
    الردود
    1. الله يسعد قلبك، شكراً لك و قرار موفق بإذن الله توصلي لنتايج مذهلة مع شعرك! أتشرف فيك

      حذف
  6. شكراااا أن شاء الله انا كمان أتقبل شعري و احبه زي ما هو لانه كيرلي كمان شكراااااااا حبيبتي لنشر تجربتك😘😘😘

    ردحذف
    الردود
    1. عفواً، بإذن الله تتقبليه و صدقيني الآن الكل يسألني و يثني على شعري بفضل الله، الموضوع يحتاج صبر و النتائج مذهلة متأكدة شعرك جميل عطيه فرصة :)

      حذف
  7. اسعدتيني من قلب واول مره اشوف صفحه عن الشعر الكيرلي تابعي موفقه

    ردحذف
  8. اسعدتيني من قلب واول مره اشوف صفحه عن الشعر الكيرلي تابعي موفقه لو عندش نصايح او وصفات نزليها جزاش الله خير

    ردحذف
    الردود
    1. أنا أسعد بردك اللطيف، أبشري بإذن الله
      و يجزاك ربي كل خير

      حذف
  9. لو سمحتي انا لي من ٢٠٠٩ وانت كل شهرين او ثلاثه اشهر بالكثير اسوي بروتين. شعري مااات مرره. الان قررت اوقف ولي ٦ شهور من اخر مره. بس شعري صار من فوق حلو وكيرلي ومن تحت مره مره ستريت. كيف اقدر اخلي اللي تحت يروح منه البروتين او يخف على الاقل عشان يتلفلف؟

    ردحذف
    الردود
    1. ألف سلامة على شعرك والله، طبيعي جداً الي تحت هو الجزء التالف لو شعرك طويل ابدأي قصيه شوية شوية مو لازم تقصي جزء كبير مرة وحدة كل فترة قصي الأطراف و مع العناية و الاهتمام راح يصير كله حلو و كيرلي بإذن الله، لو قصير اصبري عليه

      حذف

يتم التشغيل بواسطة Blogger.